Fokus-plus - Navigation

Schnitzelbänke in der Kontaktgruppe Abendtreff

Bänklischliffer aus dem Baselbiet

Am Freitag, 8 März besuchten die Bänklischliffer aus dem Baselbiet die Kontaktgruppe Abendtreff in Olten. Sie erzählten vom Ursprung der Schnitzelbänke und allerlei Interessantes rund um das Thema Fasnacht. Natürlich haben sie auch ihre aktuellen Verse vorgetragen. Hier nochmals zum nachlesen:

 

Räntner tüe sie neuerdings mit Chindergärtner zämmesteckä

Sie wie so d`Läbesgeister vo de alte neu erweckä

D`Seniore finde`s schampar glatt, sie chönne wider lachä

S`Prinzip dervo isch s`gliich wie das wo mir do mit euch machä

 

Schneider-Amman, Leuthard Doris und Arno del Curto

hei sich all entschlosse ihres Amt ufz`geh und furt go

Sogar d`Merkel will gli go, au d`Lindsey Vonn hört uff

und Putin Merde dä Maudet, dä schriibt witer Spese uff

 

Tätsch – es Goal scho tüe die Duuble ä Doppeladler machä

als Representant vo dr Schwyz macht mä nid so Sachä

Trotzdem cheu sie wiiterschutte anders gseht`s scho drii

wenn s`Telefon nid abnimmsch, jä, denn bisch halt Miss Schweiz gsi

 

Ob Moutier jetzt zum Jura ghört oder Kanton Bern

isch eu zweene schissegal kein hät d`Jurassier gärn

vo eus us chöi d`Franzose doch das kurlig Völkli ha

als Supplement do hänke mir Züri au no dra

 

Germanie und Cobalt Air, au Skywork isch betroffä

die Fluggsellschafte si bankrott, es isch ne nümm so gloffä

s`ligt am Priis vom Kerosin ghört mä us gwüssä Kreisä

mir glaube s`isch will all meh Lüt im Gummiböötli reisä

 

Sit 10 Johr do dörfsch scho nümm in dä Beizä schlote

Künftig chasch am Bahnhhof au in d`Bredouille grote

Mir chöi das nid begriffe, wie cha`s das numme geh

z`mindscht am Bahnhoff sett mä doch ä Zug no dörfä neh

 

Allpott si sie cho und hei mi Seel welle bekehrä

die Züüge vom Jehova selle sich zum Tüüfel scherä

Sie hei mi so lang gnärvt bi i ne ha uf d`Schnuure geht

Und jetzt wo n`i die los bi – lüte die vor FDP

 

Zum mis Smartphone ufdue chan i jetzt mi Grind iscänne

Di hütig Technik schaffts, dass es mis Gsicht denn duet erkennä

Mi Frau hät`s au so igstellt das hät ihres Ego gschundä

Das Natel hät sie schnuerstracks mit me Gsichtschirurg verbundä

 

D`Hitzewälle hät eus zeigt, mä setti Wasser spaarä

dr Konsum vo däm raare Guet möglischt abefahrä

Mir hei eus jetze überleit, was mir do chöi biträgä

Statt Wasser trinke mir zum Schluss äs Tröpfli vo dä Räbä